අයුමු ෆුජිනො කියන්නෙ ප්‍රාථමික පාසල් ශිෂ්‍යාවියක්. ඇය හරිම දක්ෂයි මේ මංගා අඳින්න. ඉතින් පාසල් සඟරාවට ඇය ඇයගෙ මංගා නිර්මාණ ඉදිරිපත් කරනවා. ඒවා කියවන අනිත් ළමයිනුත් ගොඩක් විනෝද වෙනවා, ෆුජිනොට ඇයගෙ දක්ෂතාවය වෙනුවෙන් ප්‍රශංසා කරනවා. ඉතින් මේ නිසා ෆුජිනො කියන්නෙ පාසලේ කාගෙත් පැසසුමට ලක්වුණ කෙනෙක්. හැබැයි තත්වය වෙනස් වෙන්නෙ කියොමොතෝ කතාවට එකතු වෙනකොට. කියොමොතෝ කියන්නෙත් පාසල් යන වයසෙ ගෑණු ළමයෙක්. හැබැයි ඇය පාසලට එන්නෙ නෑ. ඒ වෙනුවට ගෙදරට වෙලා ඇයත් මංගා අඳින්න උත්සහ කරනවා. ඉතින් පාසලෙ ගුරුතුමා ෆුජිනොගෙන් අහනවා මේ කියොමොතෝටත් පාසල් සඟරාවට මංගා එකක් අඳින්න අවස්ථාවක් දෙන්න කියල. ඉතින් ඔන්න ඒ අනුව දැන් පාසල් සඟරාවෙ ෆුජිනො ගෙ සහ කියොමොතෝගෙ මංගා පළවෙන්න පටන් අරගෙන. ඇත්තටම මේ කතාව බලනකොට ඔයාටම තේරෙයි දෙන්නගෙන් කවුද වැඩේ හොඳටම කරලා තියෙන්නෙ කියල.

ඉතින් මේක මේ මංගා අඳින දෙන්නෙකුගෙ කතාවක්ද කියල ඔයාට දැන් හිතෙනවා ඇති. නෑ… ඊට එහා ගියපු හරි අපූරු, සංවේදී ජීවන කතාවක් තමයි මේ නිර්මාණයෙ තියෙන්නෙ. ඒ නිසාමයි මං කියනවට වඩා ඔයාම මේක බලලා ඔයාම මේක තේරුම් ගන්න ඕනෙ…

පැයකට ආසන්න ධාවන කාලයක් තියෙන මේ Look Back ඇනිමේ චිත්‍රපටය Studio DURIAN කියල ස්ටුඩියෝවක් විසිනුයි නිෂ්පාදනය වෙන්නෙ. ඇනිමේ වෙනුවෙන් වෙන්වුණු MAL තුළින් 8.7ක අගයකුත් Imdb තුළ 7.9ක අගයකුත්, Rotten Tomatoes තුළින් 100%ක් දිනාගන්න Look Back සමත් වෙනවා. ඒ වගේම මේක Drama Shounen කියන ශානරවලටයි වැටෙන්නෙ.

මේ වෙනකොට Look Back ජපානයෙ Hochi Film Award හිදි Best Animated Picture සම්මානය දිනාගෙන තියෙනවා. ඒ වගේම Best Animated Feature – Independent යටතෙ Annie සම්මානයකටත් නිර්දේශ වෙලා තියෙනවා.

2024දි ගොඩක් අයගෙ පැසසුමට ලක්වුණු නිර්මාණයක් තමයි මේ Look Back කියන්නෙ. තව දෙයක් අවසන් වශයෙන් කියන්න ඕනෙ… ජීවිතයෙ අපි සම්භාවිතාවන් ගැන හිතලා බලනවනෙ. මේක මෙහෙම උනොත් ජීවිතේ කොහොම වෙයිද වගේ. අන්න ඒ වගේ අවස්ථාවක් මේකෙ හරි අපූරුවට නිර්මාණය කරලා තියෙනවා. බලලම ඉන්නකො එහෙනම් කොහොමද කියල ඒක…

• Japanese