ඇමරිකානු පවුලක් වෙන ස්ටීවන්ස් පවුල දකුණු පැසිෆික් දූපතක් වන මැන්ඩලිනෝ වෙත සියලු වියදම් දරන නිවාඩු සංචාරයක් නෝමිලේ දිනාගන්නවා. මෙයාලගේ පවුලේ ළමයි 3 දෙනෙක් ඉන්නවා, එක කෙල්ලයි කොල්ලෝ දෙන්නයි. ඉතින් මේ පවුලේ අම්මා තාත්තා මේක තමන්ට ලැබුණ හොඳ අවස්ථාවක් කියලා හිතලා මේ ගමන යන්න පිටත් වෙන්න තීරණය කරනවා. මේ දූපතට ගියාම බොහොම උණුසුම් ආදරණීය පිළිගැනීමක් ස්වදේශික දූපත් වාසීන්ගෙන් මෙයාලට ලැබෙනවා. මෙයාලා හොඳ විනෝදයෙන් සාමකාමීව මේ දූපතේ කල් ගෙවමින් ඉන්නවා. ඒත් දවසක් මේ පවුලේ ඉන්න බාල කොල්ලා ලුවීස් කරන එක වැඩක් නිසා මුළු ස්ටීවන්ස් පවුලම එක මොහොතින් කබලෙන් ලිපට වැටෙනවා. මෙයාලට ආයේ ගෙදරවත් යාගන්න බැරුව මේ දූපතේ හිරවෙනවා. දවස් ගෙවෙනවත් එක්ක මෙයාලට කන්න කෑමක්වත් නැතුව යනවා. මේකෙන් මේ පවුල වියරුවැටිලා වගේ එකිනෙකා කටයුතු කරන්න ගන්නවා. පවුලේ වැඩිමල් දියණිය රෙන් මේ දූපතේ අභිරහස් දූපත්වාසියෙකු එක්ක ආදර සම්බන්ධයක් ඇති කරගන්නවා, මේකෙන් මේ කතාවට නව මානයක් එකතු කරනවා. අවසානයේ එක ලොකු බොරුවක් ගැන මේ පවුල දැනගන්නවා. ඒකෙන් මේ හැමදෙනාම පුදුම වෙනවා.