මෙහි ප්‍රධාන චරිතය වන සයිලස් ජොන්සන් (Silas Johnson) කියන්නේ නිතරම අන් අයගේ හිරිහැර වලට සහ සමච්චලයට ලක්වන, කිසිම කෙනෙකුට විරුද්ධව නැගී සිටින්නට බැරි බයගුලු මනුස්සයෙක්. තමන් ආදරය කරන රෝස් (Rose) නම් තරුණිය ඉදිරියේ පවා අන් අයගෙන් අවමන් විඳින්නට සිදුවීම නිසා ඔහු දැඩි කලකිරීමකට පත්වෙනවා.
​මේ තත්ත්වයෙන් මිදී මිනිස්සුන්ගේ ගෞරවය දිනාගන්න හිතන ඔහුට දිනක් යක්ෂයාව (The Devil) මුණගැසෙනවා. එහිදී තමන්ගේ ආත්මය යක්ෂයාට පාවා දී, ලෝකයේ වේගවත්ම සහ භයානකම තුවක්කුකාරයා වෙන්න සයිලස් යක්ෂයා සමඟ ගිවිසුමක් ගහනවා. මේ ගිවිසුමත් එක්ක එයාට තුවක්කු සටනකදී කාලය නතර කිරීමේ බලයක් ලැබෙනවා. ඒත් ඒකේ භයානක කොන්දේසියක් තියෙනවා; එනම් තමන්ට අභියෝග කරන ඕනෑම කෙනෙකුව ඔහු විසින් අනිවාර්යයෙන්ම මරා දමන්නට සිදුවීමයි.
​බලය සහ ගෞරවය ලැබුණත්, සයිලස් ක්‍රමයෙන් කිසිම අනුකම්පාවක් නැති දරුණු මිනීමරුවෙක් බවට පත්වෙනවා. අවසානයේදී මේ දරුණු ජීවිතය නිසාම ඔහුට තමන්ගේ ආදරයත් (රෝස්) අහිමි වී ජීවිතයම විනාශ මුඛයට යනවා. තමන් ගත්තු මේ වැරදි තීරණය ගැන දැඩි ලෙස පසුතැවෙන සයිලස්, පාස්ටර්වරයෙකුගේ උදව්වෙන් යක්ෂයාගේ ගිවිසුමෙන් ගැලවිලා තමන්ගේ ආත්මයයි, නැතිවුණු ආදරයයි ආපහු ලබාගන්න අපූරු අරගලයක නිරත වෙනවා.