විවාහකයන් තුල තම සහකරුගේ විශ්වාසනීයත්වය ගැන සැක සංකා ඇති වීම එතරම් දුලබ දෙයක් නෙමෙයි. නාරි වෛද්‍යවරියක් වන කැතරින්ට තම සැමියා වන ඩේවිඩ් ගැන ඇති වන සැකයක් තහවුරු කර ගැනීමට ඇය යොදා ගන්නේ තරමක් අමුතු උපක්‍රමයක්. එනම් ඉහල පැලැන්තියේ ගණිකාවක් වන ක්ලෝයි යොදවා ඩේවිඩ්ගේ අන් ස්ත්‍රීන්ට ඇති නැඹුරුව පරීක්ෂා කිරීමයි. ඒත් මේ උපක්‍රමයේ ඇති බරපතල බව ඇයට වැටහෙන්නේ තත්වය දුර දිග ගොස් ඇයගේ පවුල අනාරක්ෂිත තත්වයකට පත්වූ පසුයි.

Atom Egoyan විසින් අධ්‍යක්ෂණය කර ඇති Chloe චිත්‍රපටය 2009 වර්ෂයේ නිකුත් වූ හොලිවුඩ් නිර්මාණයක්. මෙය අයත් වන්නේ Erotic Thriller ඝනයට. ටොරොන්ටෝ නගරයේ සම්පූර්ණයෙන්ම රූපගත කිරීම් සිදුකර ඇති මෙය,  2003 වර්ෂයේ නිපදවුනු Nathalia නම් වූ ප්‍රංශ සිනමා නිර්මාණයක් ඇසුරු කර ගෙන නිමවා ඇති බවයි සඳහන් වෙන්නේ.

මෙහි ප්‍රධාන චරිත තුන වන ඩේවිඩ්, කැතරින් සහ ක්ලෝයි ලෙස රඟපාන්නේ හොලිවුඩයේ සුපිරි තරු තුනක් වන ලියම් නීසන් (Schilndler’s List, Taken), ජූලියානා මුවර් (Hannibal, Lost World) සහ ඇමැන්ඩා සී‍ෆ්‍රීඩ් (Jennifer’s Body, Dear John) විසිනුයි.මීට අමතරව නැගී එන හොලිවුඩ් නලුවෙක් වෙන මැක්ස් තීරයට් (Jumper, Disconnect), කැතරින් සහ ඩේවිඩ්ගේ පුත්‍රයා ලෙස රඟපානවා. IMDB දර්ශකයේ 6.3 ක අගයක් රඳවා ගෙන ඇති මේ සිනමා සිත්තම මුල සිට අගට කුතුහලයෙන් යුතුව නැරඹිය හැකි කථාවක් ඉදිරිපත් කරනවා.