ජේම්ස් කැමරන්ගේ (James Cameron) අද්විතීය අධ්‍යක්ෂණයෙන් හැඩවුණු, ලොව පුරා ප්‍රේක්ෂකයන් නොඉවසිල්ලෙන් බලා සිටින “Avatar: Fire and Ash”, පැනඩෝරා (Pandora) ග්‍රහලෝකයේ මින් පෙර කිසිදා නුදුටු, ත්‍රාසජනක මෙන්ම අඳුරු පැතිකඩක් නිරූපණය කරනවා. ‘The Way of Water’ චිත්‍රපටයේදී මුහුණ පෑමට සිදුවූ අතිශය හැඟීම්බර වියෝවෙන් පසුව, ජේක් සුලී (Jake Sully), නයිටිරි (Neytiri) සහ ඔවුන්ගේ පවුලේ සාමාජිකයන් සිය කඳුළු දරාගෙන, පැනඩෝරාවේ පැවැත්ම උදෙසා කරන මීළඟ දැවැන්ත සටනට පිවිසෙන විදිහ ඔයාලට මේ කතාවෙන් බලාගන්න පුලුවන් වෙනවා.

මෙහිදී ජේක් සුලීගේ පවුලට පැනඩෝරාවේ වෙසෙන තවත් නවතම ගෝත්‍රයක් වන “අළු මිනිසුන්” (Ash People) හෙවත් ‘මැන්ග්ක්වාන්’ (Mangkwan) ගෝත්‍රය මුණගැසේ. කෲර මෙන්ම ගිනිදැල් මෙන් සැර පරුෂ ‘වෙරෑන්ග්’ (Varang) ගේ නායකත්වයෙන් යුත් මොවුන්, සාමකාමී ‘එයිවා’ (Eywa) දෙවඟනගේ මඟ අතහැර, ගින්දර සහ බලය පමණක් අදහන අතිශය කලහකාරී පිරිසක් ඒනිසාම මෙවර කතාවෙන් නාවී (Na’vi) වරුන්ගේ මෙතෙක් ප්‍රේක්ෂකයන් නුදුටු අඳුරුතම ස්වභාවය පෙන්නුම් කරනවා.

අනෙක් පසින්, අහස් මිනිසුන් (Sky People / RDA සංවිධානය) පැනඩෝරාවේ සම්පත් කොල්ලකෑම තවදුරටත් තීව්‍ර කර ඇති අතර, ඔවුන්ගේ මීළඟ කෲර ඉලක්කය වන්නේ මුහුදේ වෙසෙන අහිංසක, බුද්ධිමත් ‘ටුල්කුන්’ (Tulkun) සතුන්ව මහා පරිමාණයෙන් දඩයම් කිරීමයි. කර්නල් ක්වොරිච් (Colonel Quaritch) තවදුරටත් ජේක්ගෙන් පලිගැනීමේ චේතනාවෙන් ඔහු පසුපස හඹා එන අතර, ඔහු සහ ඔහුගේ පුතු වන ස්පයිඩර් (Spider) අතර ඇති සංකීර්ණ බැඳීම තවත් තීරණාත්මක සහ සංවේදී අතකට හැරෙනවා. මේ සියලු යුධමය ගැටුම් මැද, කිරි (Kiri) සහ ශ්‍රේෂ්ඨ මාතාව (Eywa) අතර ඇති අද්භූත හා ගැඹුරු බැඳීම තවත් බලවත් වන අතර, ඇය සතු ඒ අපූර්ව හැකියාව මුළු පැනඩෝරාවේම ඉරණම වෙනස් කළ හැකි පෙරනිමිත්තක් බවට පත්වෙනවා. Avatar: Fire and Ash කියන්නේ  පවුලේ බැඳීම, ශෝකය දරාගැනීම සහ වෛරයේ ඇති විනාශකාරී බව මනාවට පිළිඹිබු කරන, දෘශ්‍යමය අතින් මෙන්ම හැඟීම්බර බවින්ද පරිපූර්ණ වූ විශිෂ්ට සිනමා සිත්තමක්. පැනඩෝරාවේ ආත්මය රැකගැනීම වෙනුවෙන් ගින්දර සහ අළු මැදින් යන මේ ගමන, Avatar කතා මාලාවේ අඳුරුතම, ත්‍රාසජනකම සහ හැඟීම්බරම පරිච්ඡේදය කියලයි ප්‍රේක්ෂකයෝ කියන්නේ. තවත් ලස්සන කතාවකින් මුණගැහෙමු.