අද මම ගෙනාවේ ටිකක් වෙනස් විදිහේ, කුතුහලයෙන් පිරුණු සුපිරිම කතාවක්. පොඩ්ඩක් හිතන්නකෝ… සාමාන්‍යයෙන් මිනීමැරුමක් වුණාම ඒක විසඳන්නේ කවුද? පොලිසියෙන්, රහස් පරීක්ෂකයින්, එහෙමත් නැත්නම් FBI වගේ ආයතන වලින් නේද? හැබැයි මේ කතාවේ මිනීමැරුම් විසඳන්න යන්නේ ඒ කිසිම කෙනෙක් නෙවෙයි. වයසට ගිහින් විශ්‍රාම සුවයෙන් ඉන්න, හැරමිටියෙන් ඇවිදින සීයලා ආච්චිලා සෙට් එකක් කිව්වොත් ඔයා විශ්වාස කරනවද?
The Thursday Murder Club (2025) චිත්‍රපටය නිර්මාණය වෙන්නේ රිචඩ් ඔස්මන් (Richard Osman) ගේ අතිශය ජනප්‍රිය, වැඩියෙන්ම අලෙවි වුණු නවකතාවක් ඇසුරින්. කතාව යන්නේ සුඛෝපභෝගී වැඩිහිටි නිවාසයක (Retirement Village) ජීවත් වෙන මිතුරන් හතරදෙනෙක් වටා. මෙයාලා හැම බ්‍රහස්පතින්දාම එකතු වෙලා පොලිසියට විසඳගන්න බැරි වුණු පරණ මිනීමැරුම් ෆයිල් අරගෙන ඒ ගැන සාකච්ඡා කරනවා. ඒකට මෙයාලා දාගත්ත නම තමයි “බ්‍රහස්පතින්දා මිනීමැරුම් සමාජය” (The Thursday Murder Club).
මෙයාලගේ මේ සාමකාමී ජීවිතේ එකපාරටම කණපිට පෙරළෙනවා. ඒ ඇයි දන්නවද? මෙයාලගේ ඇස් ඉස්සරහම, මෙයාලා ජීවත් වෙන ප්‍රදේශයේම ඇත්තම මිනීමැරුමක් සිද්ධ වෙනවා! ඉතින් මේ හතරදෙනා තීරණය කරනවා පොලිසියට කලින් මේකේ සුලමුල හොයාගන්න.
මේ ෆිල්ම් එකේ රංගනයෙන් දායක වෙන්නේ හොලිවුඩයේ දැවැන්තයෝ ටිකක්. Helen Mirren, Pierce Brosnan, Ben Kingsley වගේම Celia Imrie මේ අමුතුම රහස් පරීක්ෂක චරිත වලට පණ පොවනවා. ඒ වගේම මේක අධ්‍යක්ෂණය කරන්නේ Harry Potter, Home Alone වගේ සුපිරි චිත්‍රපට අධ්‍යක්ෂණය කරපු සුප්‍රකට අධ්‍යක්ෂක Chris Columbus විසින්.
ඉතින් මේ වයසක මිතුරන් හතරදෙනාට ඇත්තම මිනීමරුවාව හොයාගන්න පුළුවන් වෙයිද? ඒ අස්සේ මෙයාලට මොන වගේ කරදර වලට මූණ දෙන්න වෙයිද? ඒක දැනගන්න නම් ෆිල්ම් එක බලන්නම වෙනවා. කුතුහලය පිරුණු, ඒ වගේම හිනාවෙවී රසවිඳින්න පුළුවන් සුපිරිම ෆිල්ම් එකක් කියලා මං සහතික වෙනවා.