ඇංගස් කියන්නේ අලුත් දේවල් හොයන ව්ලොගර් කෙනෙක්. එයා තමන්ගේ හිතේ තියෙන ප්‍රශ්න ටිකක් අමතක කරන්න හිතාගෙන කැලේ මැද තියෙන හුදකලා කැබින් එකකට යන්න තීරණය කරා. හැබැයි එතනදි එයාට දැනෙන්න ගත්තා මේ මහා කැලේ ඇතුළේ මොකක්දෝ අමුතු බලවේගයක් හැංගිලා ඉන්නවා කියලා. ටිකෙන් ටික බය හිතෙන දේවල් සිද්ධ වෙන්න ගනිද්දී, එයාගේ තනිවීමේ අදහස සම්පූර්ණයෙන්ම භයානක අත්දැකීමක් බවට පත්වෙන හැටි මේකෙන් බලාගන්න ලැබෙයි.
මේක සාමාන්‍ය හොරර් කතාවකට වඩා ටිකක් වෙනස් අත්දැකීමක්. බ්‍රිතාන්‍යයේ කැලෑබද ප්‍රදේශයක් පසුබිම් කරගෙන නිර්මාණය වුණු මේ චිත්‍රපටය, ගොඩක් දුරට Found Footage (කැමරාවකින් රෙකෝඩ් කරන විදියේ) ශෛලියට තමයි රූගත කරලා තියෙන්නේ. ඒ නිසාම ප්‍රධාන චරිතයට දැනෙන බය කෙලින්ම ප්‍රේක්ෂකයාට දැනෙන විදියට නිර්මාණය කරන්න එයාලා උත්සාහ කරලා තියෙන හැඩයි.
චාලි රොබ් සහ ඩග්ලස් ටෝන් කියන අධ්‍යක්ෂකවරු දෙන්නා එකතුවෙලා මේක FoundTV ප්ලැට්ෆෝම් එකට විශේෂයෙන්ම හදපු නිර්මාණයක්. කැලේ ඇතුළේ තියෙන මූසල නිහැඬියාව වගේම, තනිවුණාම දැනෙන මානසික පීඩනය මේ කතාව පුරාවටම දකින්න ලැබෙනවා. විශේෂයෙන්ම බය හිතෙන දේවල් එකපාරටම ඉස්සරහට එනවට වඩා, හෙමින් සැරේ බය වැඩි කරන විදියේ ගමනක් තමයි මේකේ යන්නේ.
සම්පූර්ණ කතාවම වගේ රූගත කරලා තියෙන්නේ ප්‍රධාන චරිතය පාවිච්චි කරන ව්ලොග් කැමරාවෙන්. මේ “Found Footage” ක්‍රමය නිසා කතාවට ලොකු තාත්වික ගතියක් එකතු වෙලා තියෙනවා.
චාලි රොබ් විසින් ප්‍රධාන චරිතය වන ඇංගස්ගේ චරිතයට පණ පොවන අතරේ, කැට් ජෝන්ස්-බර්ක් සහ ඩග්ලස් ටෝන් සෙසු චරිත සඳහා රංගනයෙන් දායක වෙනවා.